ມີຫລາຍພາກສ່ວນມອບໄດ້ເຄື່ອງ ແລະ ເງິນ ຊ່ວຍເຫລືອຕ້ານໂຄວິດ-19

ຫລາຍພາກສ່ວນມອບເຄື່ອງ ແລະ ເງິນ ຊ່ວຍເຫລືອຕ້ານໂຄວິດ-19

ຂປລ. ໃນຕອນແລງວັນທີ 30 ເມສາ 2021 ທີ່ສຳນັກງານນາຍົກລັດຖະມົນຕີ ໄດ້ມີພິທີມອບ-ຮັບເຄື່ອງ ແລະ ເງິນຊ່ວຍເຫລືອຈາກພາກສ່ວນຕ່າງໆ ໃຫ້ແກ່ລັດຖະບານລວມມູນຄ່າເກືອບ 6 ຕື້ກີບ ເພື່ອນຳໃຊ້ເຂົ້າໃນການຕ້ານ ແລະສະກັດກັ້ນການແຜ່ລະບາດຂອງພະຍາດໂຄວິດ-19 ຢູ່ ສປປ ລາວ.ໃນໂອກາດນີ້, ຕາງໜ້າໃຫ້ແກ່ລັດຖະບານແຫ່ງ ສປປ ລາວ ກ່າວຮັບໂດຍ ທ່ານ ກິແກ້ວ ໄຂຄໍາພິທູນ ຮອງນາຍົກລັດຖະມົນຕີ, ຫົວໜ້າຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19; ມີຄະນະສະເພາະກິດ, ຜູ້ຕາງໜ້າກະຊວງ ແລະ ວິຊາການກ່ຽວຂ້ອງເຂົ້າຮ່ວມ. ການມອບການຊ່ວຍເຫລືອຄັ້ງນີ້ ປະກອບມີ 6 ພາກສ່ວນ ຄື:

ກະຊວງເຕັກໂນໂລຊີ ແລະ ການສື່ສານມອບເງິນຈຳນວນ 33 ລ້ານກີບ ພ້ອມທັງສະເໜີລະບົບການຕິດຕາມ Lao KYCapplication ຕິດຕັ້ງເທິງມືຖືໃນຂັ້ນພື້ນຖານ ທີ່ກະຊວງໄດ້ຄົ້ນຄວ້າ ແລະ ທົດລອງນຳໃຊ້ເພື່ອໃຊ້ໃນການຕິດຕາມປະຫວັດການເຄື່ອນໄຫວ (timeline) ຂອງບຸກຄົນ ແລະ ແຈ້ງເຕືອນເມື່ອເຂົ້າໃກ້ສະຖານທີ່ ທີ່ມີຄວາມສ່ຽງໃນການແຜ່ເຊື້ອ;

ບໍລິສັດລາວໂທລະຄົມມະນາຄົມມະຫາຊົນ ມອບເງິນ 2,5 ຕື້ກີບ ແລະ ອຸປະກອນການສື່ສານຂອງບໍລິສັດມູນຄ່າ 783 ລ້ານກີບ, ລວມມູນຄ່າທັງໝົດ 3,283 ຕື້ກີບ;

ບໍລິສັດດາວທຽມລາວເອເຊຍ-ປາຊີຟິກຈຳກັດມອບເງິນຈຳນວນ 100 ລ້ານກີບ ແລະ ອຸປະກອນການສື່ສານຂອງບໍລິສັດມູນຄ່າ 1,53 ຕື້ກີບ, ລວມມູນຄ່າທັງໝົດ 1,63 ຕື້ກີບ;

ບໍລິສັດຜະລິດ-ໄຟຟ້າລາວມະຫາຊົນ ມອບເງິນ 500 ລ້ານກີບ;

ບໍລິສັດ ETL ຈຳກັດ ມອບເງິນຈຳນວນ 150 ລ້ານກີບ ແລະ ອຸປະກອນການສື່ສານຂອງບໍລິສັດ ມູນຄ່າ180 ລ້ານກີບ, ລວມມູນຄ່າທັງໝົດ 330 ລ້ານກີບ; ແລະ

ບໍລິສັດລັດວິສາຫະກິດໄປສະນີລາວ ມອບເງິນຈຳນວນ 50 ລ້ານກີບ ແລະ ຂົນສົ່ງເຄື່ອງໃຊ້ວຽກງານຕ້ານພະຍາດໂຄວິດ-19 ໂດຍບໍ່ເສຍຄ່າ ມູນຄ່າ150 ລ້ານກີບ, ລວມມູນຄ່າທັງໝົດ 200 ລ້ານກີບ;

ໂອກາດດັ່ງກ່າວ, ທ່ານຮອງນາຍົກລັດຖະມົນຕີ ໄດ້ສະແດງຄວາມຂອບໃຈ ແລະ ຊົມເຊີຍຕໍ່ບັນດາພາກສ່ວນຕ່າງໆ ຕະຫລອດຮອດພະນັກງານຂອງບັນດາພາກສ່ວນ ທີ່ໄດ້ປະກອບສ່ວນມອບອຸປະກອນ ແລະ ເງິນຊ່ວຍເຫລືອເຂົ້າໃນການຈັດຕັ້ງປະຕິບັດວຽກງານປ້ອງກັນ, ສະກັດກັ້ນ, ຄວບຄຸມ ແລະແກ້ໄຂການແຜ່ລະບາດຂອງພະຍາດໂຄວິດ-19 ຢູ່ ສປປ ລາວ.

ການປະກອບສ່ວນດັ່ງກ່າວ ແມ່ນສອດຄ່ອງກັບຄວາມຮຽກຮ້ອງຕ້ອງການຕົວຈິງ ຂອງສະພາບການໃນປັດຈຸບັນ, ຊຶ່ງໄດ້ສະແດງເຖິງຫົວຄິດປະດິດສ້າງ ຮູ້ໝູນໃຊ້ທ່າແຮງທີ່ຕິດພັນກັບໜ້າທີ່ການເມືອງຂອງການຈັດຕັ້ງຕົນ ປະກອບສ່ວນເຂົ້າໃນການປະຕິບັດພາລະກິດລວມຂອງປະເທດຊາດ ໃຫ້ເກີດປະໂຫຍດສູງສຸດ, ທັງສະແດງເຖິງຄວາມເສຍສະຫລະ, ຄວາມເອື້ອເຟື້ອເພື່ອແຜ່, ຄວາມເປັນຫ່ວງເປັນໃຍ, ຄວາມສາມັກຄີເປັນເອກະພາບ, ຄວາມເປັນແບບຢ່າງທີ່ດີ ແລະ ກາຍເປັນກຳລັງແຮງ-ກຳລັງໃຈອັນໃຫຍ່ຫລວງ ໃຫ້ແກ່ພັກ-ລັດ ແລະ ປວງຊົນລາວທັງຊາດໂດຍສະເພາະພະນັກງານແພດໝໍ ແລະ ເຈົ້າໜ້າທີ່ທຸກຄົນ ທີ່ພວມປະຕິບັດໜ້າທີ່ຕ້ານການແຜ່ລະບາດຂອງພະຍາດໂຄວິດ-19 ຢູ່ໃນທົ່ວປະເທດ, ພ້ອມທັງໃຫ້ຄຳໝັ້ນສັນຍາວ່າ ຈະນໍາໃຊ້ເຄື່ອງຊ່ວຍເຫລືອ ແລະ ເງິນດັ່ງກ່າວ ໃຫ້ຖືກກັບຈຸດປະສົງເປົ້າໝາຍ ແລະ ເກີດປະໂຫຍດສູງສຸດ ໂດຍສະເໜີໃຫ້ບັນດາພາກສ່ວນທີ່ໄດ້ມອບການຊ່ວຍເຫລືອໃນຄັ້ງນີ້ ຈົ່ງພ້ອມກັນຕິດຕາມ ແລະ ຊຸກຍູ້ການນຳໃຊ້ເຄື່ອງ ແລະເງິນດັ່ງກ່າວ ໃຫ້ມີຄວາມໂປ່ງໃສ, ໄປຮອດໄປເຖິງເປົ້າໝາຍ, ສອດຄ່ອງກັບເນື້ອໃນຈິດໃຈຂອງການຊ່ວຍເຫລືອຢ່າງແທ້ຈິງ.

ອັນສຳຄັນ, ທ່ານໄດ້ຮຽກຮ້ອງມາຍັງທຸກພາກສ່ວນໃນສັງຄົມ ເພີ່ມທະວີຄວາມເປັນຈິດໜຶ່ງໃຈດຽວກັນ ຮ່ວມກັບລັດຖະບານ ເປັນເຈົ້າການປະຕິບັດບັນດາມາດຕະການປ້ອງກັນ, ສະກັດກັ້ນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ຢ່າງເຂັ້ມງວດ ປະກອບສ່ວນເຮັດໃຫ້ການປະຕິບັດພາລະກິດຕ້ານພະຍາດໂຄວິດ-19 ຄັ້ງນີ້ໄດ້ຮັບຜົນສຳເລັດຢ່າງຈົບງາມ ໂດຍສະເພາະການຄວບຄຸມຈຳນວນຜູ້ຕິດເຊື້ອໃຫ້ຫລຸດລົງ ແລະ ບໍ່ໃຫ້ມີຜູ້ເສຍຊີວິດຈາກການແຜ່ລະບາດຂອງພະຍາດໂຄວິດ-19 ຢູ່ ສປປ ລາວ ໃນຄັ້ງນີ້.

ນອກນັ້ນ, ທ່ານຮອງນາຍົກລັດຖະມົນຕີ ຍັງໄດ້ແຈ້ງໃຫ້ຊາບກ່ຽວກັບສະພາບການແຜ່ລະບາດຂອງພະຍາດໂຄວິດ-19 ຢູ່ໃນໂລກ ກໍ່ຄືພາຍໃນ ສປປ ລາວ, ລວມທັງບົດ ຮຽນ, ທ່າແຮງ ແລະ ມູນເຊື້ອອັນດີງາມຕ່າງໆ ເພື່ອນຳໃຊ້ເຂົ້າໃນຕໍ່ສູ້ຕ້ານການແຜ່ລະບາດຂອງພະຍາດໂຄວິດ-19, ໂດຍຫວັງຢ່າງຍິ່ງວ່າດ້ວຍບົດຮຽນ, ປະສົບການ, ທ່າແຮງ, ມູນເຊື້ອອັນດີງາມ ແລະ ຄວາມສາມັກຄີເປັນປຶກແຜ່ນຂອງປວງຊົນລາວທັງຊາດ ຈະເຮັດໃຫ້ປະເທດພວກເຮົາສາມາດຜ່ານຜ່າ ຄວາມຫຍຸ້ງຍາກ ແລະ ເອົາຊະນະເຊື້ອພະຍາດທີ່ຮ້າຍແຮງດັ່ງກ່າວນີ້ໄດ້.

ທີ່ມາ

ພາບ-ຂ່າວ: ກົມປະຊາສຳພັນຫສນຍ

Related Posts

Leave a Reply

Your email address will not be published. Required fields are marked *