ຜູ້ນຳລັດເຊຍ-ຈີນ ປຶກສາຫາແນວທາງຮ່ວມມືກັນ ຕ້ານການເຄື່ອນໄຫວທີ່ເປັນໄພຈາກຕາເວັນຕົກ

ລາຍງານ 16 ທັນວາ 2021, ທ່ານ ວະລາດິເມຍ ປູຕິນ ປະທານປະເທດລັດເຊຍ ແລະ ທ່ານ ສີ ຈິ້ນຜິງ ປະທານປະເທດຈີນ ໄດ້ພົບປະຫາລືກັນຜ່ານລະບົບອອນລາຍ ເມື່ອວັນພຸດ (15 ທັນວາ 2021) ທີ່ຜ່ານມາ ໂດຍຜູ້ນຳລັດເຊຍກ່າວກັບຜູ້ນຳຈີນແບບກົງໄປກົງມາວ່າ ລັດຖະບານລັດເຊຍກຳລັງຜະເຊີນກັບໄພຮຸກຮານຈາກ ສ.ອາເມຣິກາ ແລະ ອົງການສົນທິສັນຍາອາກລັງຕິກເໜືອ (NATO) ທີ່ເຄື່ອນຍ້າຍໂຄງສ້າງທາງທະຫານມາຕັ້ງຢູ່ໃກ້ກັບຊາຍແດນລັດເຊຍ ອັນໄດ້ສົ່ງຜົນກະທົບໂດຍກົງຕໍ່ຜົນປະໂຫຍດຂອງລັດເຊຍ.

ຂະນະທີ່ສຳນັກຂ່າວຊິນຫົວລາຍງານເນື້ອໃນຕອນໜຶ່ງຂອງການສົນທະນາວ່າ: “ກອງກຳລັງບາງກຸ່ມ ທີ່ຢູ່ພາຍໃຕ້ໜ້າກາກຂອງປະຊາທິປະໄຕ ແລະ ສິດທິມະນຸດ” ກຳລັງພະຍາຍາມແຊກແຊງວຽກງານພາຍໃນຂອງທັງລັດເຊຍ ແລະ ຈີນ, ຍິ່ງໄປກວ່ານັ້ນ ກຸ່ມຄົນເຫຼົ່ານີ້ໄດ້ທຳລາຍບັນທັດຖານຂອງກົດໝາຍລະຫວ່າງປະເທດ ແລະ ແນວທາງປະຕິບັດຮ່ວມກັນລະຫວ່າງປະຊາຄົມໂລກ, ດ້ວຍເຫດນີ້ ລັດເຊຍ ແລະ ຈີນ ຈຶ່ງຄວນຍົກລະດັບການຮ່ວມມືໃນດ້ານທີ່ກ່ຽວຂ້ອງ ໃຫ້ມີປະສິດທິພາບຫຼາຍກວ່ານີ້ ເພື່ອປົກປ້ອງຜົນປະໂຫຍດຂອງທັງສອງປະເທດ.

ໃນດ້ານຂອງທ່ານ ຢູຣິ ອູຊາຄັອບ ທີ່ປຶກສາດ້ານນະໂຍບາຍຕ່າງປະເທດຂອງທ່ານ ປູຕິນ ໃຫ້ຂໍ້ມູນເພີ່ມເຕີມວ່າ ທ່ານ ສີ ຈິ້ນຜິງກ່າວກັບຜູ້ນຳລັດເຊຍວ່າ ລັດຖະບານຈີນມີຄວາມເຂົ້າອົກເຂົ້າໃຈເປັນຢ່າງດີ ຕໍ່ວິກິດດ້ານຄວາມໝັ້ນຄົງຂອງລັດເຊຍ ແລະ ສະເໜີໃຫ້ການສະໜັບສະໜູນແກ່ລັດຖະບານລັດເຊຍ ໃຫ້ໄດ້ຮັບຫຼັກປະກັນຢ່າງເປັນທາງການ ແລະ ມີຜົນຜູກພັນຕາມກົດໝາຍລະຫວ່າງປະເທດຈາກຕາເວັນຕົກ.

ນອກຈາກນີ້, ທ່ານ ຢູຣິ ອູຊາຄັອບ ກ່າວອີກວ່າ ຜູ້ນຳຈີນ ໃຫ້ຄວາມເຫັນໃນດ້ານລົບ ຕໍ່ການທີ່ ສ.ອາເມຣິກາ, ອັງກິດ ແລະ ອົດສະຕຣາລີ ຮ່ວມກັນສ້າງຕັ້ງພັນທະມິດສາມຝ່າຍອໍຄັສ (AUKUS) ແລະ ຄວອດ (Quad) ທີ່ເປັນການຮ່ວມມືລະຫວ່າງ ສ.ອາເມຣິກາ, ອິນເດຍ, ຍີ່ປຸ່ນ ແລະ ອົດສະຕຣາລີ.

ໃນສ່ວນຂອງບັນຫາອື່ນໆນັ້ນ ເມື່ອບໍ່ດົນມານີ້ ລັດເຊຍ ແລະ ຈີນເຫັນດີຮ່ວມກັນໃນຫຼັກການຂະຫຍາຍກອບເວລາຂອງສົນທິສັນຍາມິດຕະພາບ ທີ່ໃຊ້ຮ່ວມກັນມາຍາວນານ 20 ປີແລ້ວ ແລ ການທີ່ຈີນຈະເປັນສູນການຜະລິດລະຫວ່າງປະເທດໃຫ້ກັບວັກແຊັງປ້ອງກັນໂຄວິດ-19 ສະປຸດນິກ-ວີ (Sputnik-V) ແລະ ສະປຸດນິກ ໄລ (Sputnk Light).

ປັດຈຸບັນ, ມູນຄ່າການຄ້າລະຫວ່າງຈີນ ກັບ ລັດເຊຍ ໃນໄລຍະ 11 ເດືອນຂອງປີ 2021 ມີມູນຄ່າ 123 ຕື້ໂດລາສະຫະລັດ ແລະ ທັງສອງປະເທດກຳນົດເປົ້າໝາຍຮ່ວມກັນໃຫ້ເຖິງ 200 ຕື້ໂດລາສະຫະລັດ ພາຍໃນຕໍ່ໜ້າ.

Related Posts

Leave a Reply

Your email address will not be published. Required fields are marked *