ສີລັງກາ ແຕ່ງຕັ້ງຄະນະລັດຖະມົນຕີຊຸດໃໝ່ແກ້ໄຂວິກິດເສດຖະກິດ
ຂປລ.ຕາມຂ່າວຈາກ ໂກໂລມບີ,ທ່ານໂກຕາ ບາຍາ(Gotabaya),ປະທານາທິບໍດີ ສີລັງກາ ແຕ່ຕັ້ງຄະນະລັດຖະມົນຕີຊຸດໃໝ່ 17ທ່ານ ໃນວັນທີ18ເມສານີ້ ເພື່ອແກ້ໄຂ ວິກິດການ ເສດຖະກິດ ທີ່ຮ້າຍແຮງ ຂອງປະເທດ ຫລັງຈາກ ລາຄາຂາຍຍ່ອຍ ນ້ຳມັນ ເຊື້ອໄຟ ເພີ່ມຂຶ້ນອີກ 35% ກ່ອນທີ່ ລັດຖະບານ ສີລັງກາ ຂໍຄວາມຊ່ວຍເຫລືອ ຈາກກອງທຶນ ການເງິນ ສາກົນ(IMF).
ສີລັງກາ ບໍ່ມີເງິນ ນຳເຂົ້າສິນຄ້າ ຍ້ອນການຂາດແຄນ ເງິນຕ່າງປະເທດ ເນື່ອງຈາກ ໂຄວິດ-19 ເຮັດໃຫ້ສູນເສຍ ລາຍໄດ້ ຈາກການທ່ອງທ່ຽວ ແລະ ເງິນສົ່ງກັບຄືນ ຈາກແຮງງານ ຢູ່ຕ່າງປະເທດ.
ປັດຈຸບັນ ສີລັງກາ ມີໜີ້ສິນ ຕ່າງປະເທດ ເກືອບ 7ຕື້ໂດລາ ສະຫະລັດ ຈາກທັງໝົດ25 ຕື້ໂດລາສະຫະລັດ ມີກຳນົດ ຊຳລະຄືນ ໃນປີນີ້.ດັ່ງນັ້ນ ລັດຖະບານ ສີລັງກາ ປະກາດ ໂຈະໜີ້ສິນ ຕ່າງປະເທດ ລະຫວ່າງ ທີ່ລັດຖະມົນຕີ ກະຊວງ ການເງິນ ແລະ ຄະນະເດີນທາງໄປເຈລະຈາ ຂໍຄວາມຊ່ວຍເຫລືອ ຈາກIMF ທີ່ຈະປະຊຸມ ປະຈຳປີ ກັບທະນາຄານໂລກ ຢູ່ນະຄອນຫລວງ ວໍຊີງຕັນ ຂອງ ສ.ອາເມລິກາ ໃນອາທິດນີ້.
ນອກຈາກນີ້ ສີລັງກາ ຍັງໄດ້ຂໍເງິນກູ້ ສຸກເສີນ ຈາກຈີນ ແລະ ອິນເດຍ ເພື່ອນຳມາຊື້ ອາຫານ ແລະ ນ້ຳມັນ ເຊື້ອໄຟ ຢ່າງຮີບດ່ວນ.
/.ຮຽບຮຽງຂ່າວໂດຍ:ສະໄຫວ ລາດປາກດີ
