Lao News

ສານຕັດສິນລົງໂທດປະຫານຊີວິດຊາຍໜຸ່ມ ອາຍຸ 40 ປີ ຖານຂົນສົ່ງຢາເສບຕິດ ແລະ ມີໄວ້ໃນຄອບຄອງ

ໃນວັນທີ 6 ພຶດສະພາ 2022, ຄະນະສານອາຍາຂັ້ນຕົ້ນສານປະຊາຊົນ ແຂວງອຸດົມໄຊ ໄດ້ເປີດກອງປະຊຸມເພື່ອຄົ້ນຄວ້າພິຈາລະນາສຳນວນຄະດີໃນຖານຂົນສົ່ງຢາເສບຕິດ ແລະ ມີຢາເສບຕິດ (ປະເພດຢາບ້າ ) ໄວ້ໃນຄອບຄອງໂດຍມີຈຳເລີຍຊື່ ທ້າວ ຢາເຊັງ ອາຍຸ 40 ປີ ຢູ່ບ້ານທອງສີ ເມືອງໂພນທອງ ແຂວງຫຼວງພະບາງ.ອົງການໄອຍະການປະຊາຊົນແຂວງອຸດົມໄຊ ໄດ້ຖະແຫຼງເນື້ອໃນຄະດີຂອງຈຳເລີຍໃຫ້ຮູ້ວ່າ: ໃນເວລາ13:00 ໂມງຂອງວັນທີ 24 ທັນວາ 2020, ເຈົ້າໜ້າທີ່ຕໍາຫຼວດ ປກສ ເມືອງປາກແບງ ແຂວງອຸດົມໄຊ ໄດ້ອອກເຄື່ອນໄຫວຕັ້ງຈຸດກວດກາຢູ່ເສັ້ນທາງເຂດບ້ານມົກແຄໃຫຍ່ ເມືອງປາກແບງ ແລະ ໃນຂະນະນັ້ນໄດ້ພົບເຫັນທ້າວ ຢາເຊັງ ຂັບ ຂີ່ລົດຈັກຮອນດາເວັບ 100 ສີແດງຕຳໝາຍເລກທະບຽນ ຈຈ 1148 ຫຼວງນໍ້າທາ ມາແຕ່ທາງ ເມືອງຜາອຸດົມ ແຂວງບໍ່ແກ້ວ ດ້ວຍທ່າທາງມີພິລຸດສົງໄສຈຶ່ງໄດ້ລັກລົດຈັກຜູ້ກ່ຽວ ພ້ອມທັງຂໍອະນຸຍາດກວດກາລົດ ແລະ ຄົ້ນຕົວ ຈຶ່ງພົບ ເຫັນຢາບ້າ ຈຳນວນ20 ມັດເທົ່າກັບ 40.000 ເມັດ ນໍ້າໜັກ 4 ກິໂລກຣາມຊຸກເຊື່ອງໄວ້ຢູ່ໃນຖົງຢາງຂອງຜູ້ກ່ຽວ,

ຈາກນັ້ນ, ຈຶ່ງໄດ້ກັກຕົວ ພ້ອມຂອງກາງມາມອບໃຫ້ພະແນກຕຳຫຼວດສະກັດກັ້ນ ແລະ ຕ້ານຢາເສບຕິດປກສ ແຂວງອຸດົມໄຊດຳເນີນຄະດີຕາມກົດໝາຍ.

ຜ່ານການສືບສວນ-ສອບສວນ, ທ້າວ ຢາເຊັງ ໄດ້ໃຫ້ການຮັບສາລະພາບວ່າ: ໃນເດືອນມິຖຸນາ 2020, ຜູ້ກ່ຽວ ໄດ້ໄປຮັບຈ້າງປາດຢາງພາລາຢູ່ບ້ານລາວຫຼວງເມືອງຫ້ວຍຊາຍ ແຂວງບໍ່ແກ້ວ.ມາຮອດວັນທີ 20 ທັນວາ 2020, ນາງ ປູ່ເຢ ( ແມ່ເມຍ) ຢູ່ບ້ານທອງເໜືອ ເມືອງໂພນທອງ ແຂວງຫຼວງພະບາງໄດ້ໂທລະສັບບອກ ໃຫ້ຜູ້ກ່ຽວກັບໄປບ້ານ ຍ້ອນແມ່ເມຍບໍ່ສະບາຍ.

ວັນທີ 23 ທັນວາ 2020, ຜູ້ກ່ຽວຈຶ່ງໄດ້ຢືມລົດຈັກຂອງທ້າວຈະ ຢູ່ ບ້ານຫົວຂົວ ເມືອງລອງ ແຂວງຫຼວງນໍ້າທາທີ່ໄດ້ ມາຢາມຜູ້ກ່ຽວຢູ່ເຮືອນ.

ຈາກນັ້ນ, ຜູ້ກ່ຽວຈຶ່ງຂັບຂີ່ລົດຄັນ ດັ່ງກ່າວອອກຈາກສວນຢາງພາລາບ້ານລາວຫຼວງ ເມືອງ ຫ້ວຍຊາຍ ແຂວງບໍ່ແກ້ວ ເພື່ອຈະກັບໄປບ້ານ. ເມື່ອຂັບຂີ່ ໄປຮອດເຂດບ້ານຫ້ວຍຊາຍນ້ອຍ ຈຶ່ງໄດ້ເຊົ່າບ້ານພັກເພື່ອ ນອນຄ້າງຄືນໃນເວ ລາຍ່າງໄປຊື້ຂອງກິນຢູ່ຕະຫຼາດໄດ້ມີ ຜູ້ຊາຍສອງຄົນ ( ບໍ່ຮູ້ຊື່ ແລະ ທີ່ຢູ່ )ຍ່າງມາຖາມຜູ້ກ່ຽວ ວ່າ:

ມາແຕ່ໃສ ແລະ ຈະໄປໃສ, ຜູ້ກ່ຽວຕອບວ່າ ມາແຕ່ບ້ານລາວຫຼວງ ຈະໄປເບິ່ງແມ່ເຖົ້າເຈັບຢູ່ບ້ານທອງເໜືອເມືອງໂພນທອງ ແຂວງຫຼວງພະບາງ ແລ້ວມີຜູ້ຊາຍຄົນຫນຶ່ງ ຊື່ ທ້າວ ລາວຕົວ ຢູ່ເມືອງນໍ້າບາກ ແຂວງຫຼວງພະບາງ ແຕ່ບໍ່ໄດ້ບອກບ້ານຢູ່ ໄດ້ເວົ້າຕື່ມວ່າ: ມີເລື່ອງຢາກລົມນຳ.

ພາຍຫຼັງທີ່ຊື້ຂອງກິນ ແລ້ວພວກກ່ຽວຈຶ່ງໄດ້ກັບມາລົມກັນຢູ່ບ້ານພັກທີ່ຜູ້ກ່ຽວເຊົ່າ ໂດຍ ທ້າວ ລາວຕົວໄດ້ ບອກໃຫ້ຜູ້ກ່ຽວຂົນສົ່ງຢາບ້າ ຈຳນວນ 20 ມັດຈາກແຂວງບໍ່ແກ້ວ ໄປສົ່ງໃຫ້ຜູ້ກ່ຽວຢູ່ເຂດບ້ານປາກມອງ ເມືອງນໍ້າບາກ ແຂວງຫຼວງພະບາງ ໂດຍຈະໃຫ້ເງິນຄ່າຈ້າງ ຈຳນວນ 500.000 ກີບ ຜູ້ກ່ຽວຈຶ່ງໄດ້ຕົກລົງ ເນື່ອງຈາກ ວ່າເປັນເສັ້ນທາງ ທີ່ຕົນຈະໄດ້ຜ່ານ.

ຮອດເວລາປະມານ 21:00 ໂມງ ຂອງວັນດຽວກັນ, ທ້າວ ລາວຕົວ ຈຶ່ງໄດ້ຂັບ ຂີ່ລົດກະບະວີໂກ້ສີຂາວ ( ບໍ່ມີໝາຍເລກທະບຽນ ) ມາຫາຜູ້ກ່ຽວຢູ່ບ້ານພັກ ແລະ ເອົາຢາບ້າຈຳນວນດັ່ງກ່າວ ມາໃຫ້ຜູ້ກ່ຽວ ແລະ ຜູ້ກ່ຽວຈຶ່ງໄດ້ ເອົາໄວ້ໃນຖົງຢາງ; ຮອດເວລາປະມານ 5:00 ໂມງ ເຊົ້າຂອງວັນທີ 24 ທັນວາ2020 ຈຶ່ງໄດ້ຂັບຂີ່ລົດອອກມາຜ່ານທາງເມືອງຜາອຸດົມ.

ເຈົ້າໜ້າທີ່ຕຳຫຼວດກວດກາພົບເຫັນ ແລະ ກັກຕົວພ້ອມເຄື່ອງຂອງກາງເຫັນວ່າ: ການກະທໍາຂອງ ທ້າວຢາ ເຊັງ (ຈຳເລີຍ) ເປັນການກະທຳທີ່ແຕະຕ້ອງຕໍ່ປະມວນກົດໝາຍອາຍາໃນ ຫມວດທີ 8 ການກະທຳຜິດກ່ຽວກັບຢາ ເສບຕິດ ໂດຍອີງຕາມໃບຢັ້ງຢືນຜົນການພິສູດ-ວິໄຈຢາເສບຕິດຂອງພະ ແນກກວດກາ ແລະ ຄວບຄຸມຢາເສບຕິດ ປກສ ແຂວງ ອຸດົມໄຊສະບັບເລກ ທີ 1985/ປກສ.ອຊ, ລົງວັນທີ 09 ມິຖຸນາ2021 ຢັ້ງຢືນວ່າ: ຢາບ້າຈຳນວນດັ່ງກ່າວ ແມ່ນ ບັນຈຸສານເສບຕິດໃນ ຫມວດ Methamphetamine (ຢາບ້າ+).

ດ້ວຍເຫດນີ້, ຄະນະສານອາຍາຂັ້ນຕົ້ນ ສານປະຊາຊົນແຂວງອຸດົມໄຊ ຈຶ່ງໄດ້ພິຈາລະນາຕັດສິນຕາມຄຳ ຕັດສິນ ເລກທີ 052/ຂຕ.ອຊ ລົງວັນທີ 6ພຶດສະພາ 2022 ບອກວ່າ: ຕັດສິນ ທ້າວ ຢາເຊັງ (ຈຳເລີຍ) ມີ ຄວາມຜິດທາງອາຍາ ໃນຫມວດທີ 8ມາດຕາ 315 ວັກ 4 ໃນການຂົນສົ່ງຢາເສບຕິດ ແລະມີຢາເສບຕິດປະເພດຢາ ບ້າໄວ້ໃນຄອບຄອງ ຖືກສານຕັດສິນລົງໂທດປະຫານ ຊີວິດ ແລະ ຮີບຢາເສບຕິດ (ປະເພດຢາບ້າ) ຈຳນວນ 20 ມັດ ເທົ່າກັບ40.000 ເມັດ ຂອງຈຳເລີຍມາທຳລາຍຖິ້ມ, ຮິບລົດຈັກຮອນດ້າ ສີແດງດຳ ໝາຍເລກທະບຽນ ຈຈ 1148ຫຼວງນໍ້າທາ ທີ່ໄດ້ນຳໃຊ້ເຂົ້າໃນການກະທຳຜິດມາເປັນຂອງລັດ.

ຂ່າວ: ໜັງສືພິມຄວາມສະຫງົບ

Related Articles

Leave a Reply

Your email address will not be published.

Back to top button