Lao News

ປກສ ແຂວງຫົວພັນ ຢຶດຢາເສບຕິດໄດ້ຫຼາຍສິບກິໂລກຣາມ

ປກສ ແຂວງຫົວພັນ ຢຶດຢາເສບຕິດໄດ້ຫຼາຍສິບກິໂລກຣາມ

ເຈົ້າໜ້າທີ່ ປກສ ແຂວງຫົວພັນ ຢຶດຢາເສບຕິດປະເພດຢາໄອສ໌ ໄດ້ 40 ກິໂລກຣາມ ແລະ ຢາບ້າ 1 ກິໂລກຣາມ, ພ້ອມລົດໃຫຍ່ 1 ຄັນ ໃນວັນທີ 21 ພຶດສະພາ 2022. ເຈົ້າໜ້າທີ່ ປກສ ແຂວງຫົວພັນ ໃຫ້ຮູ້ວ່າ:

ໄດ້ຮັບລາຍງານຈາກພົນລະເມືອງດີວ່າ ຈະມີກຸ່້ມຄົນໜຶ່ງເຄື່ອນຍ້າຍຢາເສບຕິດຢູ່ເສັ້ນທາງຊໍາເໜືອ-ວຽງຈັນ ໃນວັນທີ 21 ພຶດສະພາ 2022, ເຈົ້າໜ້າທີ່ໄດ້ອອກກວດ ກາລາດຕະເວນ ໄດ້ພົບເຫັນລົດກະບະ ໂຕໂຍຕ້າ ຣີໂວ້ ໝາຍເລກທະບຽນ ກຳແພງນະຄອນ ອສ 5699 ທີ່ຂັບຂີ່ມຸ່ງໜ້າມາທາງຊໍາເໜືອ.

ຈາກນັ້ນ, ເຈົ້າໜ້າທີ່ ຈິ່ງໄດ້ລັດລົດເພື່ອກວດກາ ແຕ່ຜູ້ຂັບຂີ່ບໍ່ໃຫ້ການຮ່ວມ ມື ແລະ ຍັງຂັບຂີ່ຜ່ານດ່ານກວດກາຂອງເຈົ້າໜ້າທີ່ຫວັງເອົາຕົວຫຼົບໜີ.

ເມື່ອຜູ້ຂັບຂີ່ມີພິລຸດສົງໄສ ເຈົ້າໜ້າທີ່ຈິ່ງໄດ້ຕິດຕາມລົດຄັນດັ່ງກ່າວໄປ ພໍໄປໄດ້ປະມານ 800 ແມັດ, ຜູ້ຂັບຂີ່ຈິ່ງໄດ້ຈອດລົດແລ້ວແລ່ນໜີເຂົ້າປ່າ.

ເມື່ອເປັນແນວນັ້ນ ເຈົ້າໜ້າທີ່ຈິ່ງຢຶດລົດຄັນດັ່ງກ່າວ ແລະ ກວດຄົ້ນ ພົບເຫັນຢາເສບຕິດປະເພດຢາໄອສ໌ ຈຳນວນ 40 ຫໍ່ ນໍ້າໜັກ 40 ກິໂລກຣາມ ທິທີ່ຊຸກເຊື່ອງຢູ່ຝາຂ້າງກະບະທັງສອງເບື້ອງ, ຝາປະຕູໜ້າ ແລະ ປະຕູຫຼັງ ທັງສອງຂ້າງ ແລະ ພົບເຫັນຢາບ້າຈຳນວນ 4 ມັດ ລວມ 8.000 ເມັດ ມີນໍ້າໜັກ 1 ກິໂລກຣາມ.

ສ່ວນຜູ້ຂັບຂີ່ແມ່ນໄດ້ເອົາຕົວຫຼົບໜີ ເຈົ້າໜ້າທີ່ກຳລັງເລັ່ງນຳ ຈັບຕົວມາດຳເນີນຄະດີ.

ທັງນີ້, ເຈົ້າໜ້າທີ່ ປກສ ແຂວງຫົວພັນ ກໍໄດ້ເອົາໃຈໃສ່ໃນການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາ ຢາເສບຕິດຢ່າງເຂັ້ມງວດ ເພື່ອໃຫ້ການແກ້ໄຂບັນຫາຢາເສບຕິດບັນລຸເປົ້າໝາຍທີ່ວາງໄວ້.

ຂ່າວ: ໜັງສືພິມຄວາມສະຫງົບ

Related Articles

Leave a Reply

Your email address will not be published.

Back to top button