ສຸດຍອດ !!! ບໍລິສັດ ຈໍາປາຫອມການຄ້າ ຂາອອກ-ຂາເຂົ້າ ຈໍາກັດຜູ້ດຽວ ກຽມສົ່ງອອກເຂົ້າສານໜຽວ ຈໍານວນ 1.000 ໂຕນ ມູນຄ່າ 1,2 ລ້ານໂດລາ

ສຸດຍອດ !!! ບໍລິສັດ ຈໍາປາຫອມການຄ້າ ຂາອອກ-ຂາເຂົ້າ ຈໍາກັດຜູ້ດຽວ ກຽມສົ່ງອອກເຂົ້າສານໜຽວ ຈໍານວນ 1.000 ໂຕນ ມູນຄ່າ 1,2 ລ້ານໂດລາສະຫະລັດ ໄປປະເທດຝລັ່ງ 🇫🇷

ພາຍໃນທ້າຍປີ 2022 ຫຼື ຕົ້ນປີ 2023 ພາຍຫລັງໄດ້ເຊັນສັນຍາກັບກັບ ບໍລິສັດ WECH GROS import-export ຢູ່ນະຄອນຫລວງວຽງຈັນ ເມື່ອບໍ່ດົນມານີ້.

​ທ່ານ ນາງ ບຸນຮຽງ ພົມມີໄຊ, ບໍລິສັດຈໍາປາຫອມການຄ້າ ຂາອອກ-ຂາເຂົ້າ ຈໍາກັດຜູ້ດຽວ ໃຫ້ຮູ້ວ່າ:

ບໍລິສັດຄູ່ຮ່ວມສັນຍາຈະຈະນໍາເຂົ້າຈາກລາວໄປວາງຈໍາໜ່າຍຢູ່ຫ້າງຊັບພະສິນຄ້າຢູ່ປະເທດຝຮັ່ງຕາມທີ່ໄດ້ຕົກລົງກັນ ເຊີ່ງບໍລິສັດຂອງຕົນມີຄວາມພ້ອມໃນການສະໜອງທັງໃນດ້ານປະລິມານ ແລະ ຄຸນນະພາບ ກໍຄື ມາດຕະຖານໃນການຜະລິດ ນັບແຕ່ການປູກຈົນຮອດຂອດການປຸງແຕ່ງ,

ພ້ອມນີ້ ຈະປັບປຸງຕົນເອງຕື່ມ ໂດຍສະເພາະການສົ່ງເສີມກຸ່ມຊາວນາປູກເຂົ້າເພີ່ມຂຶ້ນ ແລະ ການນຳໃຊ້ເຄື່ອງມືທັນສະໄໝເຂົ້າໃນຂະບວນການຜະລິດ ເນື່ອງຈາກປັດຈຸບັນ ບໍລິສັດໄດ້ສົ່ງເສີມຊາວ ນາປູກເຂົ້າ ຈໍານວນ 600 ຄອບຄົວ, ມີເນື້ອທີ່ນາທັງໝົດ 600 ກວ່າເຮັກຕາ.

​ທ່ານໃຫ້ຮູ້ຕື່ມວ່າ: ໃນໄລຍະຜ່ານມາບໍລິສັດຂອງຕົນ ໄດ້ສົ່ງເຂົ້າໄປປະເທດແບນຊິກ ມາແລ້ວ 2 ຄັ້ງ ຄື: ຄັ້ງທໍາອິດ ຈໍານວນ 50 ໂຕນ ແລະ ຄັ້ງທີ 2 ຈໍານວນ 200 ໂຕນ ແລະ ຈະມີຄັ້ງທີ 3 ໃນໄວໆນີ້ ເນື່ອງຈາກຄວາມຕ້ອງການມີເພີ່ມຂຶ້ນ ຄາດຄະເນປະມານ 200 ໂຕນ.

ສ່ວນການສົ່ງອອກເຂົ້າສານໜຽວ ຈໍານວນ 1.000 ໂຕນ ໄປປະເທດຝລັ່ງຕາມທີ່ໄດ້ເຊັນສັນຍາກັນ ຄາດວ່າຈະມີຂຶ້ນໃນທ້າຍປີ 2022 ຫຼື ຕົ້ນປີ 2023.​ສໍາລັບ ບໍລິສັດ ຈໍາປາຫອມການຄ້າ ຂາອອກ-ຂາເຂົ້າ ຈໍາກັດຜູ້ດຽວ ມີສໍານັກງານຕັ້ງຢູ່ບ້ານດອນໜູນ, ເມືອງໄຊທານີ, ນະຄອນຫລວງວຽງຈັນ.

FM 90 ລາຍງານ

Related Posts

Leave a Reply

Your email address will not be published. Required fields are marked *