Lao News

ຊົມເຊີຍ

ປກສ ແຂວງອຸດົມໄຊ ມອບພາຫະນະທີ່ຖືກຄົນຮ້າຍລັກໄປຄືນໃຫ້ເຈົ້າຂອງເດີມ

ພັຕ ບຸນເມກ ສຸດາຈັນ ຮອງຫົວໜ້າພະແນກສືບສວນ – ສອບສວນ ປກສ ແຂວງອຸດົມໄຊ ໃຫ້ຮູ້ວ່າ:
ໃນເດືອນຕຸລາ 2022, ພະແນກສືບສວນ – ສອບສວນ ປກສ ແຂວງອຸດົມໄຊ

ໄດ້ຮັບແຈ້ງຄວາມຈາກຜູ້ເສຍຫາຍວ່າ: ມີລົດຈັກເສຍຈຳນວນຫຼາຍຄັນ. ສະນັ້ນ, ຄະນະຫ້ອງຕໍາຫຼວດ ປກສ ແຂວງ ຈຶ່ງໄດ້ແຕ່ງຕັ້ງພະນັກງານວິຊາສະເພາະລົງເກັບກຳຂໍ້ມູນ ສາມາດກັກຕົວເປົ້າໝາຍລັກລອບຊື້-ຂາຍຊັບຜິດກົດໝາຍ (ປະເພດລົດຈັກ) ໄດ້ຈຳນວນ 3 ຄົນ, ພ້ອມທັງຢຶດຂອງກາງລົດຈັກ ຈຳນວນ 7 ຄັນ.

ໃນວັນທີ 5 ຕຸລາ 2022, ເຈົ້າໜ້າທີ່ຕຳຫຼວດ ປກສ ແຂວງອຸດົມໄຊ ໄດ້ຮັບແຈ້ງຄວາມຈາກເຈົ້າໜ້າທີຕຳຫຼວດ ປກສ ແຂວງບໍລິຄຳໄຊ ວ່າ: ເວລາ 5 ໂມງເຊົ້າຂອງວັນທີ 4 ຕຸລາ 2022,

ໄດ້ມີຄົນຮ້າຍມາລັກຊັບ ປະເພດລົດກະບະ TOYOTA REVO ສີຂາວ ໝາຍເລກທະບຽນ ກໍາແພງນະຄອນ 3366 ຈໍານວນ 01 ຄັນ ຂອງປະຊາຊົນທີ່ຈອດໄວ້ຢູ່ສວນຢາງພະລາ ເຂດບ້ານແຄນຢອງ ເມືອງບໍລິຄັນ ແຂວງບໍລິຄຳໄຊ ເປົ້າໝາຍໄດ້ຂັບຂີ່ລົດຄັນດັ່ງກ່າວມຸ່ງໜ້າໄປຕາມເສັ້ນທາງເລກ 13 ເໜືອ.

ສະນັ້ນ,ຄະນະບັນຊາວິຊາສະເພາະກອງບັນຊາການ ປກສ ແຂວງອຸດົມໄຊ ຈຶ່ງແຕ່ງຕັ້ງພະນັກງານລົງເຄື່ອນໄຫວລັດສະກັດ ເພື່ອກວດກາຕາມຈຸດເສັ້ນທາງ ເວລາຕໍ່ມາ, ເຈົ້າໜ້າທີ່ ປກສ ແຂວງອຸດົມໄຊ ຈຶ່ງສາ ມາດກັກຕົວຜູ້ກະທຳຜິດໄດ້ 1 ຄົນ ພ້ອມທັງຂອງກາງ ລົດກະບະລີໂວ 1 ຄັນ.

ຜ່ານການສືບສວນ-ສອບສວນ, ທ້າວ ເຢີຊົງ ອາຍຸ 23 ປີ, ສັນຊາດລາວ, ອາຊີບເຮັດສວນ, ຢູ່ບ້ານຜາໄລ ເມືອງບໍລິຄັນ ແຂວງບໍລິຄຳໄຊ ໄດ້ໃຫ້ການຮັບສາລະພາບວ່າ ຜູ້ກ່ຽວ ແລະ ພັກພວກ ຈຳນວນ 2 ຄົນ ໄດ້ລົງມືລັກລົດຄັນດັ່ງກ່າວແທ້

ເພື່ອຈະນຳໄປຂາຍອອກຢູ່ແຂວງບໍ່ແກ້ວ ມາຮອດຈຸດກວດກາ ຫຼັກກິໂລແມັດທີ່ 24 ລະຫວ່າງເສັ້ນທາງເມືອງໄຊ – ເມືອງນາໝໍ້ ຈຶ່ງຖືກເຈົ້າໜ້າທີ່ຕຳຫຼວດກັກຕົວ ພ້ອມຂອງກາງມາດຳເນີນຄະດີ.

ມາຮອດໃນຄັ້ງວັນທີ 26-27 ຕຸລາ 2022 ເຈົ້າໜ້າທີ່ກອງວິຊາສະເພາະຫ້ອງຕໍາຫຼວດ ປກສ ແຂວງອຸດົມໄຊ ຈຶ່ງໄດ້ຈັດພິທີມອບ-ຮັບ ພາຫະນະຈຳນວນດັ່ງກ່າວໃຫ້ແກ່ເຈົ້າຂອງຊັບເດີມຢ່າງເປັນທາງການ

ໃນນີ້ ມີພາຫະນະລົດຈັກຢີ່ຫໍ້ HONDA WAVE 100 ຈໍານວນ 6 ຄັນ, HONDA CLICK-I 125 cc ຈຳນວນ 01 ຄັນ ແລະ ລົດກະບະ TOYOTA REVO ຈໍານວນ 01 ຄັນ ໂດຍຊ່ອງໜ້າເຈົ້າໜ້າທີ່ ພະແນກກ່ຽວຂ້ອງ ພ້ອມດ້ວຍເຈົ້າຂອງຊັບເຂົ້າຮ່ວມ.

ຕໍ່ກັບສະພາບປະກົດການດັ່ງກ່າວ, ຈຶ່ງຮຽກຮ້ອງມາຍັງຜູ້ປະກອບການທຸກພາກສ່ວນຕະຫຼອດຮອດພໍ່ແມ່ປະຊາຊົນບັນດາເຜົ່າ

ຈົ່ງພ້ອມກັນຍົກສູງສະຕິລະວັງຕົວ ແລະ ເປັນເຈົ້າການຄຸ້ມຄອງປົກປັກຮັກສາ ຊັບສິນຂອງຕົນເອງໃຫ້ມີຄວາມຮັບປະກັນ ແລະ ປອດໄພ ເພື່ອບໍ່ໃຫ້ເກີດມີຊ່ອງຫວ່າງ ແກ່ພວກກຸ່ມຄົນບໍ່ດີທີ່ເຄື່ອນໄຫວລັກຊັບ.

ຂໍ້ມູນຈາກ:

https://www.facebook.com/100062486205411/posts/pfbid02j6sM7XMvukPEFhCD5i94u4s5ivqDyG8rPDGJN5EdLp5SqN4TyBtinxiprZ5RBrU3l/

Related Articles

Leave a Reply

Your email address will not be published. Required fields are marked *

Back to top button