ເມືອງກວັນ ຍັງມີຄອບຄົວທຸກຍາກຫຼາຍກວ່າ​ເຄິ່ງ​ໜຶ່ງ

ເມືອງກວັນ ຍັງມີຄອບຄົວທຸກຍາກຫຼາຍກວ່າ​ເຄິ່ງ​ໜຶ່ງ
……….


ເມືອງ​ກວັນ ຕັ້ງຫ່າງຈາກເທດສະບານ ແຂວງຫົວພັນ 179 ກມ,​ ມີ​ເນື້ອທີ່​​ທັງ​ໝົດ 1.467,42 ກມ2, ທິດເໜືອຕິດກັບເມືອງຊໍາໃຕ້, ທິດໃຕ້ຕິດກັບເມືອງເຕືອງເຢື້ອງ-ເມືອງກີເຊີນ ແຂວງເງ້ອານ ສສ ຫວຽດນາມ, ທິດຕາເວັນອອກຕິດກັບເມືອງເກ້ຟອງ ແຂວງເງ້ອານ ສສ ຫວຽດນາມ.

ທິດຕາເວັນຕົກຕິດກັບເມືອງໜອງແຮດແຂວງຊຽງຂວາງ. ເມືອງ​​ກວັນປະ​ກອບ​ມີ​ຈຳ​ນວນ 71 ບ້ານ, ມີ 4.092 ຄົວ​ເຮືອນ, ມີ​ພົນ​ລະ​ເມືອງ​ທັງ​ໝົດ 26.530 ຄົນ ຍິງ12.950 ຄົນ, ສະ​ເລ່ຍ​ຄວາມ​ໜາ​ແໜ້ນ18ຄົນ/ກມ2, ປະກອບ​ມີ 4 ເຜົ່າ​ທີ່​ຢູ່​ຮ່ວມ​ກັນ​ຄື: ເຜົ່າ​ລາວ​​ມີ 7.087 ຄົນ ຍິງ 3.424 ຄົນ ກວມ​ເອົາ26,71%, ເຜົ່າ​ມົ້ງ​ ມີ 14.509 ຄົນ ຍິງ 7.167 ຄົນ ກວມ​ເອົາ 54,69%, ເຜົ່າ​ກຶມ​ມຸມີ 3.101ຄົນ ຍິງ 1.453 ຄົນ ກວມ​ເອົາ11,69%, ເຜົ່າ​​ໄຕ​ມີ 1.833 ຄົນ ຍິງ 906 ຄົນ ກວມ​ເອົາ 6,91%.


ເມືອງ​ກວັນ​ເປັນ​ເມືອງ​ໜຶ່ງທີ່​ມີ​ພື້ນຖານ​ເສດຖະກິດ​ຂະຫຍາຍຕົວ​ຢູ່​ໃນ​ລະດັບ​ປານກາງຖ້າ​ທຽບ​ໃສ່​ເມືອງ​ອື່ນໆພາຍ​ໃນ​ແຂວງຫົວພັນ, ລະບົບ​ໄຟຟ້າ​ ​ແລະ ນໍ້າ​ປະປາສ່ວນຫຼາຍຍັງ​ຢູ່​ໃນ​ໄລຍະກໍາລັງ​ກໍ່ສ້າງ, ​ເສັ້ນທາງ​ຄົມມະນາຄົມ​ຍັງ​ບໍ່​ທັນ​ສະ​ດວກ, ຊົນລະປະທານ​ຫຼາຍ​ແຫ່ງ​ຍັງ​ບໍ່​ທັນ​ໄດ້​ຮັບ​ການ​ກໍ່ສ້າງ, ໃນ​ຂະ​ນະ​ດຽວ​ກັນ​ບາງ​ແຫ່ງ​ກໍ​ເກີດ​ເປ່​ເພ​ຊຸດ​ໂຊມແຕ່​ຍັງ​ບໍ່​ໄດ້​ຮັບ​ກ​ານ​ສ້ອມ​ແປງ ຈຶ່ງ​ບໍ່​ສາ​ມາດຕອບ​ສະໜອງນໍ້າ​ເຂົ້າ​ໃສ່​ການ​ຜະລິດ​ນາປີ ​ແລະ ນາ​ແຊງ.


ຜ່ານການລົງກໍາສະຖິຕິຄອບຄົວທຸກຍາກພາຍໃນເມືອງທຽບໃສ່ເງື່ອນໄຂ ຕາມດໍາລັດ 348/ລບ ມາຮອດປັດຈຸບັນ, ເມືອງມີຈຳນວນ​ບ້ານ​ທຸກ​ຍາກ​ທັງ​ໝົດ ​68 ບ້ານ ຂອງຈໍານວນບ້ານທົ່ວເມືອງ, ມີ​ຄອບຄົວທຸກ​ຍາກ 2.297 ຄອບຄົວ​ ເທົ່າກັບ 56,13%, ມີ​ບ້ານພັດທະນາ​​ທັງ​ໝົດ 16 ບ້ານເທົ້າກັບ 22,54% ຂອງຈໍານວນບ້ານທັງໝົດ, ມີຄອບຄົວ​ພັດທະນາ 1.400 ຄອບຄົວ ເທົ່າກັບ 34,21% ຄອບຄົວພັດທະນາສ່ວນຫຼາຍແມ່ນດໍາເນີນທຸລະກິດ, ຄ້າຂາຍ, ເຮັດການບໍລິການ ແລະ ເປັນຕົວແບບປູກພືດເປັນສິນຄ້າ ເຊັ່ນ: ປູກ ໜາກກຽ້ງ,ຊາ ແລະ ອື່ນໆ.
ທ່ານ ດາວເພັດ ພົມສຸວັນ ເລາພັກເມືອງ ເຈົ້າເມືອງກວັນ ແຂວງຫົວພັນກ່າວ່າ: ໃນຊຸມປີຕໍ່ໜ້ານີ້,ເມືອງ​ກວັນ ຈະບຸກບືນສູ້ຊົນສ້າງ​ເງື່ອນ​ໄຂ​ອຳນວຍ​ຄວາມສະດວກໃຫ້​ທຸກ​ພາກສ່ວນ​ເສດຖະກິດຂະຫຍາຍຕົວ​ ​ແລະ ປະກອບສ່ວນ​ໃນ​ການ​ພັດທະນາຢ່າງ​ແຂງ​ແຮງ, ​ເພື່ອຫັນປ່ຽນເອົາ​ເສດຖະກິດ​ທຳ​ມະ​ຊາດ​ໄປ​ສູ່​ເສດຖະກິດ​ສິນຄ້າ, ສ້າງເສ​ດຖະກິດ​ຕະຫຼາດຕາມ​ທິດ​ສັງຄົມ​ນິຍົມ​ໃຫ້​ສົມບູນ​ຍິ່ງໆຂຶ້ນ. ຈັດສັນພື້ນທີ່ທໍາການຜະລິດ, ມອບດິນ, ມອບປ່າໃຫ້ປະຊາຊົນເປັນຜູ້ຄຸ້ມຄອງນໍາໃຊ້ ແລະ ສົ່ງ​ເສີມ​ການຜະລິດ​ດ້ວຍ​ຮູບ​ການ​ທີ່​ເໝາະສົມ ໂດຍອີງໃສ່ແນວຄິດສ້າງສັນຂອງປະຊາຊົນເປັນບັນຫາສຳຄັນ, ລວມທັງ​ເສດຖະກິດຄອບຄົວ, ​ເສດຖະກິດ​ຄອບຄົວ​ແບບ​ເປີດ​ກວ້າງ ​ແລະ ວາງນະ​ໂຍບາຍສົ່ງ​ເສີມ​ທີ່​ເປັນ​ລະບົບຄົບສຸດ​ເຊັ່ນ: ​ນະ​ໂຍບາຍ​ດ້ານ​ການສະໜອງທຶນ, ຂໍ້​ມູນ​ຂ່າວສານ, ​ເຕັກ​ໂນ​ໂລ​ຊີ​ອັນໃໝ່ລວມທັງ​ດ້ານ​ວິຊາ​ການ ​ແລະການ​ຕະຫຼາດ, ນໍາໃຊ້ລະບົບຂໍ້ຜູກພັນສອງສົ້ນ. ສູ້ຊົນແກ້ໄຂຈໍານວນບ້ານທຸກຍາກໃນທົ່ວເມືອງໃຫ້ໄດ້ 15 ບ້ານສະເລ່ຍປີລະ 3 ບ້ານ, ຈໍານວຄອບຄົວທຸກຍາກໃຫ້ໄດ້ 1.065 ຄອບຄົວ, ສະເລ່ຍປີລະ 213 ຄອບຄົວ, ປະກາດບ້ານພັດທະນາ​ໃໝ່ໃຫ້ໄດ້ 15 ບ້ານ ຄອບຄົວພັດທະນາ​ໃໝ່ໃຫ້ໄດ້ 660 ຄອບຄົວ.ຄາດວ່າຮອດປີ 2024 ທົ່ວ​ເມືອງ​ຈະ​ມີ​ບ້ານພົ້ນຄວາມທຸກຍາກ 18 ບ້ານ ເທົ່າກັບ 25,35% ຂອງຈໍານວນບ້ານທັງໝົດ; ອັດຕາຄວາມທຸກຍາໃຫ້ຍັງເຫຼືອ 30,11%ຂອງຈໍານວນຄອບຄົວເຮືອນທັງໝົດ.
ຂ່າວ: ຕະວິນຍານ
ພາບ:ນັກຂ່າວເມືອງກວັນ

Related Posts

Leave a Reply

Your email address will not be published. Required fields are marked *