ຮອງນາຍົກລັດຖະມົນຕີ, ຫົວໜ້າຄະນະສະເພາະກິດແຫ່ງ ສປປ ລາວ ໄດ້ໃຫ້ຄຳເຫັນວ່າ:

ທ່ານ ສຈ ກິແກ້ວ ໄຂຄຳພິທູນ, ຮອງນາຍົກລັດຖະມົນຕີ, ຫົວໜ້າຄະນະສະເພາະກິດແຫ່ງ ສປປ ລາວ ໄດ້ໃຫ້ຄຳເຫັນວ່າ “ການຊີ້ນຳການປ້ອງກັນ ແລະ ແກ້ໄຂບັນຫາການແຜ່ລະບາດຂອງພະຍາດ ໂຄວິດ-19 ນີ້ ໃຫ້ເຮັດຄືກັນກັບການບັນຊາການຕໍ່ສູ້ໃນສະໜາມຮົບ”

ທ່ານ ສຈ ກິແກ້ວ ໄຂຄຳພິທູນ, ຮອງນາຍົກລັດຖະມົນຕີ, ຫົວໜ້າຄະນະສະເພາະກິດແຫ່ງ ສປປ ລາວ ເປັນປະທານກອງປະຊຸມປຶກສາຫາລືລະຫວ່າງຄະນະສະເພາະກິດຂັ້ນສູນກາງ ແລະ ນະຄອນຫຼວງວຽງຈັນ ຕໍ່ກັບມາດ ຕະການຄວບຄຸມພະຍາດ ໂຄວິດ-19 ໂດຍສະເພາະໄລຍະວັນທີ 21 ພຶດສະພາ ຫາວັນທີ 4 ມິຖຸນາ 2021, ທ່ານໄດ້ຊີ້ນຳໃຫ້ຄະນະສະເພາະກິດຂັ້ນສູນກາງ ແລະ ນະຄອນຫຼວງວຽງຈັນ ຈົ່ງໄດ້ສືບຕໍ່ປະຕິບັດມາດຕະການທີ່ກຳນົດໃນແຈ້ງການ 528/ຫສນຍ,

ລົງວັນທີ 20 ພຶດສະພາ 2021 ຢ່າງເຂັ້ມງວດ ແລະ ເດັດຂາດ ຂຶ້ນຕື່ມ, ສຳລັບມາດຕະການຜ່ອນຜັນ ໃຫ້ປະຕິບັດບົນພື້ນຖານຫຼັກການຮັບປະກັນການປ້ອງກັນການຕິດເຊື້ອ ແລະ ແຜ່ເຊື້ອພະຍາດ ຢ່າງເຂັ້ມງວດ; ລະດົມພາກສ່ວນຕ່າງໆ ເປັນຕົ້ນອົງການປົກຄອງ, ທະຫານ, ຕຳຫຼວດ ເພື່ອຕິດຕາມກວດກາການເຂົ້າ-ອອກ,

ໂຄສະນາ ເຜີຍແຜ່ຄວາມອັນຕະລາຍຂອງພະຍາດ ໂຄວິດ-19 ແລະ ການປ້ອງກັນຕິດເຊື້ອ ແລະ ແຜ່ເຊື້ອ; ມີມາດຕະການເດັດຂາດຕໍ່ຜູ້ລະເມີດມາດຕະການທີ່ວາງອອກ; ປຸກລະດົມປະຊາຊົນເຂົ້າຮ່ວມຂະບວນການປ້ອງກັນ, ສະກັດກັ້ນ ໃຫ້ການຈັດຕັ້ງບ້ານເປັນເຈົ້າການຕິດຕາມການເຄື່ອນໄຫວຂອງບຸກຄົນທີ່ຢູ່ໃນຄວາມຮັບຜິດຊອບຂອງຕົນ ໂດຍສະເພາະບ້ານເຂດແດງ ແລະ ເຂດເຫຼືອງ.

ພ້ອມນີ້, ໃຫ້ຂະແໜງສາທາລະນະສຸກ ສືບຕໍ່ເອົາໃຈໃສ່ປະຕິບັດມາດຕະການທາງການແພດໃຫ້ດີທີ່ສຸດ ເປັນຕົ້ນການເຝົ້າລະວັງ, ການກວດຫາເຊື້ອ, ການປ້ອງກັນ, ການສັກວັກຊີນ, ການປິ່ນປົວຜູ້ຕິດເຊື້ອ ແລະ ອື່ນໆ ຂໍໃຫ້ທຸກພາກສ່ວນຕ້ອງສູ້ຊົນເຮັດໜ້າທີ່ໃຫ້ດີທີ່ສຸດ ໂດຍນຳໃຊ້ທຸກທ່າແຮງທີ່ມີ, ສິ່ງສຳຄັນ ການຊີ້ນຳການປ້ອງກັນ ແລະ ແກ້ໄຂບັນຫາການແຜ່ລະບາດຂອງເຊື້ອພະຍາດນີ້ ໃຫ້ຄືກັນກັບ ການບັນຊາການຕໍ່ສູ້ໃນສະໜາມຮົບ.

ທີມາ: (27 ພຶດສະພາ 2021 ທີ່ຫ້ອງວ່າການນະຄອນຫຼວງວຽງຈັນ)

Related Posts

Leave a Reply

Your email address will not be published. Required fields are marked *